|
|
 ntzerkia
|
tetro
|
Umore aniztasuna
Heldu
dira Pasaiako XXIV Umorezko Antzerki Jardunaldiak
Urriko bi asteburutan burutuko dira
Egitaraua zazpi antzezlanek osatzen dute
 Umorezko
antzerkiaz gozatzeko aukera eskaintzen dute urriaren 14tik 23ra
bitartean Pasaian burutuko diren XXIV Umorezko Antzerki Jardunaldiek
eta aurtengo edizioan izango diren zazpi konpainiek aurkeztuko dituzten
antzezlanen bidez, umorezko antzerkiaren aniztasunaren erakusleiho
bilakatuko direlarik.
Pasai San Pedroko Udal Aretoan, Antxoko Kultur Etxean eta Trintxerpeko
Ziriza Etxean taularatuko dira Euskal Herriko zein Madrildik Pasaiako
Jardunaldietara gerturatuko diren ikuskizunak, eta Zirizan hain
zuzen aurkeztuko du Vaivén Producciones-ek bere azken ekoizpena,
Nasdrovia Txekhov!.
Anton Chéjov idazle ospetsua hil zela ehun urte bete diren
urte berean eta Vaivén Produccioneseko buru den Ana Pimentaren
ideiari jarraiki, idazle errusiarraren omenez beronen zenbait ipuinetatik
abiatu da Alberto Iglesias ikuskizunaren testua idazteko.
Fernando Bernués zuzendari dela, Nasdrovia Txekhov! ‘Audizioa’
kontakizunetik abiatzen den eta bost ipuinez osatzen den ipuina
da. Historioa XIX. mende bukaerako antzoki zahar baten kokatzen
da eta Chéjov bera du protagonista. Bertan idazleak egunkari
batetarako idatzita izan behar zituen ipuinak bukatu gabe ditu eta
arrapaladan idatzi behar horretan antzokian aurkitzen diren pertsonaien
laguntzaz baliatu beharko da.
Kafe Antzerkia
Golden Apple Quartet donostiarrak ere izango dira aurtengo Jardunaldietan
Los Golden en Serio azken ikuskizunarekin barre algarak sortarazteko
asmoz. Carlos Zabalaren gidoari jarraiki eta Patxi Barco zuzendari
dutela, orain arte burututako ibilbidearen isla den lan honetan
laukoteak genero eta musika estilo ezberdinekin jolasten du. Golden
Apple Quarteten zazpigarren lana izaki, eta aurretik ere estilo
gehienak aztertuak baditu ere, opera, flamenkoa edota gargarak,
zirkoa eta panpinekin uztartzen dituzte ezagun dugun umorearekin
nahastuz.
Donostiako laukotearen emanaldiarekin batera, Kafe Antzerki atalean
bigarren ikuskizun bat ere izango da, Madrildik helduko den Digital
Produccionesek burutuko duena alegia.
Ironiak darrai
Débora Izaguirre eta Rocío García-Cano Fina
eta Segura dira Fina y Segura, el musical, antzezlaneko protagonista
nagusiak. Emakume bi hauek oso ezberdinak dira, baina gaur, poliziaren
komisaldegian topo egin dute eta hizketan zein abesten hasi ondoren
horren ezberdinak ez direla konturatu ere... agian mundu ezberdinetatik
datoz, egoera ezberdinak bizi dituzte baina funtsean ez al dituzte
behar berberak izango?
El Gato Negro talde madrildarrak bestalde Emmanuel Vaccaren Ildebrando
Biribó o un soplo al alma ikuskizuna taularatuko du Pasai
San Pedroko Udal Aretoan.
Iñaki Rikarteren zuzendaritzapean Alberto Castrillo-Ferre
aktoreak Ildebrandoren istorioa antzeztuz, 1897an Edmond Rostanden
‘Cyrano de Bergerac’ ikuskizunaren estreinaldian apuntadorea
izan zena eta obraren amaieran hilda aurkitu zutena alegia, antzerkiaren
munduari buruzko hausnarketa samurra hurbilduko du.
Antzerki dokumentala
 En
grilletes (La historia de Choni Parker) ikuskizuna izango da aurtengo
Pasaiako Umorezko Jardunaldiei bukaera emango dien emanaldia. Sexpeare
& Las Grotesquesen lan hau Choni Parkerren istorioari buruzko
antzerki dokumentala da, Choni, 50 metroko garaiera duen emakumea
baita. Errealitate honek ondorio ezberdinak sortarazten dizkio emakume
erraldoiari eta Las Grotesqueseko kiedeak diren Alaitz Cabriada
eta Elena Lombaik egoera umoretsuen bidez aurkeztuko dituzte. Sexpeareren
ikuskizunaren gakoa ala ere ondorengo galderari erantzutea da; Gizartea
prest al dago horren handia den emakume bat beraz barre egin gabe
onartzerko? Ikuskizunak, umore garratzari bide emanez galdera erantzuten
ahaleginduko da.
Igandeetan
piratek Jai. Haurrek ere Umore Jardunaldietaz gozatzeko
aukera izango dute Markeliñek urriaren 14an Pasai San
Pedroko Udal Aretoan burutuko duen ikuskizunarekin.
Aurtengo edizioari hasiera emango dion Igandeetan piratek
jai antzezlana eskolentzako emanaldia izango da soilik, eta
Altxorraren Uhartearen kontakizuna hizpide duela, igandero
zaharren egoitza batetara amona bisitatzera joaten den neskatxa
baten gorabeherak aurkezten ditu. Neskatilak, amonaren falta
handia sumatzen du eta igandea noiz helduko zain dagoela,
piraten istorio bat irudikatzen du aste osoa berauekin uhartez
uharte altxorra ezkutatzen dabilela jolasten ematen duelarik,
haurrek egunerokotasunetik aldentzeko duten abileziaren metafora
bat islatuz.
|
|
