|
|
 abal
gunea |
ona
Abierta
|
Arte
eszenikoak bere osotasunean
 Antzerkia,
musika eta karrika gaiaren inguruan burutuko da aurten Zuberoako
Maule eta Gotaine Irabarne herrietan, Abotia elkarteak eta Herri
Soinulariak antolatutako Xiru 13 ekimena, non arte eszenikoen zenbait
atal gozagarri izango diren. Jaialdiaren hamairugarren ekitaldiak
kultur dinamika garatzeaz gain, sorkuntza edo artisten topaketak
izango ditu helburu, beti ere “Herria eta bere ohitura baikorki
bizituz”, antolatzaileen esanetan.
Aurtengo jaialdia hiru egunetan eta bi herritan banatuko da. Maule
gaineko plazan 22an hasiko diren ekitaldiak Gau pasa, gai basa ikuskizunarekin
hasiko da, non Uztaritzeko Ihauteko dantzari eta musikariez gain,
Le Petit Théâtre de Pain antzerki taldea eta Okzitaniako
Robert Callas eta Lapurdiko Ugutz Roble kontalariak izango diren
saioa osatzeko.
Maskarada ardatz
Eskiulako Maskaradarekin emango diote hasiera 23ko ekitaldiei, Mauleko
plazan eta inguruetan izango baitira goizeko hamarretatik aurrera
Zuberoako antzerki herrikoian tartekatzen diren barrikadak. Maskarada
emanaldia, haatik, herriko plazan burutuko da arratsaldeko hiruetatik
aurrera. Gaueko saioak Gotaine Irabarneko gelan burutuko dira eta
bederatzietan hasiko diren agerraldiak Antzerki zaharra, hats berria
izenburupean bilduko dira. Zuberoako Tokia taldeak XVI. mendeko
Ruzzante idazlearen lanean oinarritutako La Moscheta obra antzeztuko
du lehenik eta jarraian Christine Dormoyk zuzentzen duen Le Grain
konpainiak Les ailes/Hegalak ikusgarria taularatuko duelarik. Bordeleko
talde honek ikusgai jarriko duen lana antzerki musikala, Georges
Aperghis eta Karlheinz Stockhausen musikagileek sortutako obrak
eta txorien munduko musikak izango ditu oinarri.
Kantu eta ausardia
Eguna bukatzeko Poitierseko bi emakumeek osatzen duten Julot Torride,
Zuberoako Uztaro taldea eta Basa txaranga oholtzaratuko dira. Kantua
eta bibolinaren laguntzarekin aritzen den Julot Torrideko bi neskak,
ausardiaz eta doinu satirikoaz antzeztuko dituzte frantsez kantu
beltzen sorta. Uztaro taldekoek, bestalde, Xiruren partaide guztiekin
batera burutuko dute beraien sorkuntza berria.
Azken eguneko ikuskizunak, 24koak alegia, Gotaine Irabarneko plazan
burutuko dira Harro harro karrika izenburupean eta pelota partiduak,
dantza jauziak eta bazkari herrikoiarekin osatuko da goizeko egitaraua.
Arratsaldeko saioak Larresoroko Le Petit Théâtre de
Pain taldeak hasiko ditu, berritutako Mesclagne ikuskizuna taularatuz.
Jarraipena antzerkia eta musika ibiltaria biltzen duen Auprès
de ma Blonde fanfarreak emango dio, ondoren, Zuberoako antzerkilariek
Kabana lana taularatuko dutelarik, maskaradetako izen bera duen
pertsonaian oinarrituta. Xiru 13ren ekimena Dantzaldi Xibero-rekin
bukatuko da.
|
