|
|
 usika |
Joera
guztien bilgunea
 Donibane
Garaziko Garazikus elkarteak antolatuta Garazique-Musikaren Festa
burutuko da ekainaren 6, 7, 8, eta 9 an, non egitarau zabalaren
barne musika joera ezberdinak entzuteko aukera izango duten bertara
gerturatzen direnak. Jazz, rock, pop, salsa eta bestelako doinuak
tartekatuko dira jaialdiak irauten duen lau egunetan.
New Orleanseko dixie doinuekin ekingo diote orain arte Mendekoste
Xaramelan izena zuen ekimenak, Estatu Batuetatik gerturatutako Daytona
Beach Big Band taldearen ekitaldia izango baita. Ostiraleko ekitaldiak
musika irakasleak eskainiko duten ‘Jazz in college’ mintegiarekin
abiatuko bada, eguneko agerraldiak erritmo afrikarrarekin amaituko
dira. Dantzak eta perkusioak uztartzen dituen Baionako Mamiwata
taldeak ekitaldia eskainiko du 21.00etan pilotalekuan.
Egun osoan musika tailerrak, scratch ikastaroak edo dantza afrikarren
ikastaldiak iragartzen badira, ikusentzunezko ekitaldia izango da
eguerdia ostean Jean-Pierre Grasset zinemaegileak sortutako Hatsa,
Matalaz I eta Matalaz II edo Maurice Ravel- Zapiak Bat dokumentalak
jarriko baitira ikusgai.
Ekitaldiei jarraipena batukada txalaparta ikastaroak, musika taldeek
egingo dituzten entseiu libreekin eta gaitero eta txistularien kalejirekin
emango dute. Salsa Verde saltsa taldeak, Marakuja eta No Beber taldeek
merkatu estalian eskainiko duten kontzertuarekin amaituko dira agerraldiak.
Kaleetan izango den musikaz gain, Grunting Smugfish, doinu zeltiarrak
eskaintzen dituen Cel3 eta Pourquoi pas taldeen saioak izango dira,
Bakarra, Luis eta Ttipia ostatuetan, hurrenez hurren. Ekimenari
bukaera emateko Nondik Nora eta Ruper Ordorika oñatiarraren
saioa izango da Le Vauban zinegelan, 21.00etan.
|
