|
|
 usika |
Harresien
babesean gozatzeko doinuak
 Baionan
izango den Jazz aux Remparts jaialdiak bere hamairugarren ekitaldia
beteko du uztailaren 16tik 21era, non eguerdiko swing saioak, bazkalondoko
doaneko kontzertuak, klaustroan arratsaldetan izango diren agerraldiak
eta Mousserollesen eskainiko diren kontzertuak jazzaren lau ‘tempoak’
osatuko dituen. Izar ugari gerturatuko dira aurten ere Lapurdiko
hiriburura, Ike Turner & The Kings of Rhythm, Mingus Big, Biréli
Lagrèbe eta bere ‘Gipsy project’, Jacky Terrasson
Trio edo Frank Tiberik zuzentzen duen Freddie Cole & The Woody
Herman Big Band tartekatu baitituzte egitarauan. Eguneroko agerraldiak
Philippe Milanta Triok Mercure Hotelean eskiniko dituen jamm session
saioekin burutuko dira.
Ike Turner eta berarekin gerturatuko den The Kings of Rhythm taldea
izago dira, zalantza izpirik gabe, aurten uztailaren 16tik 21era
Baionan burutuko den Jazz aux Remparts ekimeneko izar distiratsuenak.
Jaialdiko azken egunean eszenaratuko den bluesman bikainak, soul
doinuetan oinarritutako errepertorioa landuko du bere ahots sendo
eta erakargarriarekin. Turner gitarrajole birtuosoa eta pianojole
trebea izateaz gain, orkestra zuzendari bikaina da. Egun blues doinuak
lantzen dituen maisuetariko bat den musikaria Audrey Madison kantaria,
Ernest Lane eta Paul Smith teklatuekin, Seth Blumberg gitarrarekin,
Kein Cooper bajuarekin, William Ray, George Taylor eta Robert Holloway
saxoekin eta mack Johnson trompetajolea izango ditu alboan.
Chicagoko bluesa
Ike Turnerren agerraldia girotzeko Carl Weathersby Blues Band eta
Trudy Lynn kantaria igoko dira eszenatokira, Chicagoko blues doinuekin
osatutako errepertorioa lantzeko. Weathersby eta Lynnekin batera
Shalon Lewis teklatujolea, Iloss Green bajujolea eta Merlvin Carlisle
bateriajolea arituko dira.
Aurtengo Jazz aux Remparts ekitaldiko saio nagusiak Mingus Big Bandekin
abiatuko dira uztailaren 16an. 1979an zendutako Charles Mingus kontrabajujole
ospetsuak, Duke Ellington handiaren ondoren musika errepertorio
oparoena idatzita utzi zuen musikaria da. Gaur egun Alex Foster
saxojoleak zuzentzen duen taldean lehen mailako bakarlariak biltzen
dira, non Mingusek idatzitako obrak eskaintzerakoan orkestren edertasun
guztia eta doinu koloretsu ahaztezinak nagusitzen diren. Hala ere,
gune ugari gelditzen zaie bakarlariei bapatekotasuna lantzeko.
Mingus Big Banden saioa hasi aurretik Jacky Terrasson Trio igoko
da Mousserolleseko eszenatokira. Jaialdiko zalegoak 1991n ezagutu
zuen Terrasson pianojolea, Pierre Boussaguet kontrabajujolearekin
aurkeztu zenean alegia. Jazz aux Rempartsekin bi disko argitaratu
eta Blue Note disketxeak fitxatu ondoren, bere hirukoa aurkeztera
dator, non Sam Smith kontrabajujolea eta Ali Jackson bateriajolea
alboan izango dituen.
Reindharten oinordekoa
 Biréli
Lagrène gitarrajole trebeak sortutako Gipsy project egitasmoa
izango da entzungai 20an. Lagrènek Estatu frantziarreko urteko
Jazz Musikariaren saria eskuratzeaz gain, Djando D’Oren ikuslegoak
emandakoa eta Victoires de la Musiqueren jazz atalekoak eskuratu
ditu. Django Reinhardten ikaslea izan ondoren, irakasleak utzitako
tokia betetzeko asmotan dabil Lagrène, Djangok sortutako
doinuak bereganatu baititu eta irudimena eta freskotasunez eskaini.
Lagrènen saioa hasi aurretik, Joan Faulkner, Cynthia Utterbach
eta Joanne Bellek osatzen duten The Three Ladies of Blues eta baraiekin
izango den Reggie Moore Trio igoko dira eszenariora. Agerraldiko
ergitarauan Bessie Smith, Billy Holiday edo Dinah Washington, blues
eta jazz kantari handiei egindako omenaldiarekin burutuko da. Reggie
Moore pianojolearekin batera Earl Bostic kontrabajujolea eta Michael
Cliffton bateriajolea eszenatokian ere izango dira.
Freddi Cole & The Woody Herman Big Band izango dira 17an Mousserolleseko
oholtzara igoko diren izarrak. Nat ‘King’ Cole ospetsuaren
anaiak, zaletuek gogoan duten saio aparta eskaini zuen iazko edizioko
azken egunean eta aurten berriro azalduko da Baionan. Orain, Frank
Tiberi maisuak zuzentzen duen orkestra erraldoiarekin batera.
17ko ekitaldi nagusia Nicolas Montier Quintetek eskainiko duen ekitaldiarekin
abiatuko da. Montier saxojoleak amestutako taldea bere inguruan
biltzea lortu du eta bertan erakusten du bere talentua heldutasunera
iritsi dela.
Dany Doriz Orchestra eta Duffy Jackson bateriajoleak, teknikoki
zein bapatekoan swing doinuak lantzeko ezaugarriak agerian jarriko
dituzte. Doriz, Parisko Caveau de la Huchette eta Slow Club jazz
txokoeta zuzendaria izateaz gain, maisua da egun bibrafonoarekin.
Alboan nerabezaroan ospetsua bilakatu zen Duffy Jackson bateriajolea
eta Michel Pastre saxojolea, Philippe Duchemin painojolea, Marc
Fosset gitarrajolea eta Patricia Lebeugle kontrabajujolea izango
ditu.
Jam Session 2002
Doriz eta Jacksonen saioa hasi aurretik André Villéger/Patrick
Artero Jazz Five izango dira oholtzan. Villeger saxojoleak eta Artero
tronpetajolek Jazz Five taldean izan zuten irakaslea gogoratuko
dute Raymond Fol omenduz egitasmoarekin. Saioa burutzeko Patrick
Villanueva pianojolea, Pierre Maingourd kontrabajujolea eta Daniel
García Bruno bateriajoleak izango dira bikoterakin batera.
Aurreko edizioetan izan den bezala, agerraldi berezia izango aurten
ere Jam Session 2002 izenburupean eta 18an izango den ekitaldian
nazioarteko lehen mailako jazz musikariek bilduko dira eszenatokian.
Terell Stafford, Warren Vaché, Jesse Davis, Rickey Woodard,
Harry Allen, Benny Green, Ray Drummond, Carl Allen eta Bobby Durham
musikariek zendu berri den Norman Granzek landutako Jazz at the
Philarmonic egitasmoari jarraipena emango diote. 18ko ekitaldi nagusia
François Biensan Zortzikoteak eskainiko duen Jazzin’
Brassens izenburua daraman kontzertuarekin abiatuako da. Biensanek
Georges Brassens ospetsuak sortutako doinuak trebeziaz moldatu ditu,
Estatu frantziarreko musikari bikainekin osatutako luxuzko zortzikotea
jendearenganatzeko.
Musserolleseko harresietan izango diren kontzertuez gain, jaialdiak
irauten dituen sei egunetan zehar saio aipagarriak izango dira Baionako
katedraleko klaustroan. 16an Nicolas Montier saxojolea eta Stan
Laferrière pianojolea izango dira; 17an bakarka ariko dira
Bernd Lhotzky eta Chris Hopkins pianojoleak; 18an Cedar Walton pianojolea
eta 19an Warren Vaché kornetajolea eta Bill Charlap pianojolea.
20an berriro izango dira Chris Hopkins eta Bernd Lhotzky, oraingoan
piano bikote bezala eta azkenengoan Patrick Villanueva igoko da
eszenatokietara.
Kaleak girotzen
Jazz doinuak eguerdian eta bazkalondoko orduetan ere entzungai izango
dira Bainoako erdialdeko kaleetan. Arratsaldeko lauretan hasiko
diren ekitaldietan Echoes of Swingekoak izango dira lehenengo lau
egunetan eta 20an ordubete lehenago hasiko da agerraldia eta 21ean
hamabietan ekingo diote. Lauretarako iragartzen diren agerraldiak
Stéphane Barbier Quartet eta gonbidatu duten André
Villegeren ekitaldiekin burutuko dira. Eguerdietako saioak Just
Friends (16an), Joyful Cats (17an), Famous Groove (18an) eta Dgégé
Triorekin (19an) osatuko dira.
Jazz aux Rempartsen egitaraua Mercure hotelean izango diren jam
sessions ekin osatuko da. Gauero Philippe Milanta Trio ariko da,
non Milanta pianojoleak, Bruno Rousselet kontrabajujolea eta Julie
Saury bateriajolea ekitaldiak abiatzeko taldekide izango dituen.
‘Off’ Jaialdia
‘Off’ Jaialdiaren bigarren edizioa burutuko da 16tik 20ra
artean Portu Berriko kalean, non Acq’s Swing eta Austin Blues;
Andoni Aguirre eta Joyfull Cats; Ternoseko Udal Musika Eskolako
Ikasleen Jazz Orkestra eta Alexander Big Band; Joyfull Cats eta
Chorale Gospel, Médico Jazz Band taldeak izango diren, hurrenez
hurren.
|
