|
|
 usika |
Ikasketa
eta kontzertuekin gozatzeko
 Zarauzko
Nazioarteko III. Jazz Mintegia ekimenaren barne izango diren ikastaldiez
gain, zuzeneko kontzertuak izango dira herriko txoko eta gune desberdinetan
egitasmoak irauten dituen zazpi egunetan zehar. Agerraldiak uztailaren
29an hasi eta abuztuaren 4arte jarraituko dute eta iragarritako
saioetan ikastaroetan parte hartzen duten ikasle eta irakasleez
gain musikari profesionalen ekitaldiekin tartekatuko dira.
Musika Plaza eta Munoan iragarritako ekitaldiez gain herriko kaleetan
zehar izango diren saioekin osatuko da egitaraua, uztailaren 31an
eta abuztuaren 3an eta 4an, eguerdian, Mac Jeara’s Band taldearen
kalejirak iragartzen baitira. Talde gipuzkoarrak New Orleansen sortu
ziren swing erritmoan oinarritzen diren dixie doinuak eskainiko
ditu.
Eszenario ezberdinetan izango diren ekitaldiak Jon Robles Trío
taldearekin hasiko dira 29an, non saxojoleak burutuzen duen hirukoak
jazz inguruko erritmoak jendearenganatuko dituen.
Oinarri euskaldunak
30eko agerraldi nagusietan Benjamín León Trío
eta Igelaren Banda taldeen saioak iragartzen dira, Musika plazan
eta Munoan, hurrenez hurren. Euskal musikagintzan aski ezagunak
diren Bixente Martínez (gitarra eta bouzoukia), Txarli de
Pablo (kontrabajua) eta Iñigo Egia (perkusioa) musikariek
osatzen duten Igelaren Bandak euskal doinu eta erritmo tradizionalak
libreki berridatzi eta armonizatzen ditu. Kasu gehienetan inprobisazioa
da kantak garatzeko tresnarik eraginkorrena nahiz eta zenbaitetan
doinuak eta arauak aldez aurretik finkaturik egon. Abiapuntu horrekin,
Zuberoako amodiozko kanta bidaia zirraragarrian bilaka liteke edo
Leintz Gatzagako Igore Eguneko kanta erritmo sasi tropikal bihurtu.
Víctor de Diego Group eta Iñaki Askunze Quertet izango
dira uztailaren 31n Musika plazan eta Munoan. Bartzelonan bizi den
Víctor de Diego saxojole bilbotarrak Satchmo Jazz Records
disketxearekin argitaratu duen Iratxo disko berriaren aurkezpena
egingo du, bere ibilbideko hirugarrena alegia. Kontzertu honetan
Jordi Bonell gitarrajolea, Rai Ferrer kontrabajujolea eta Marc Miralta
bateriajolea izango ditu taldekide.
Satchomo disketxeak argitaratutako beste lan baten pasarteak izango
dira entzungai eguneko bigarren saio nagusian, Iñaki Askunzek
argitaratutako La calle de la dudako doinuak nagusituko baitira.
Ekitaldian Mike Kaupa tronpetajolea, Jon Robles saxojolea, Albert
Bover pianojolea, Gonzalo Tejada kontrabajujolea eta Guillermo McGuill
bateriajolea izango ditu taldekide Askunzek. Diskoa zuzenean grabatu
zen 1999an Tarragonako El Vendrell hirian dagoen auditorioan eta
bertan doinu berrien sorkuntza eta moldakuntza emankorrean murgiltzen
da taldeburua. Bide batez omenalditxoa egiten dio Wayne Shortereri,
nabarmena baita Azkunzeren ibilbidean saxojole eta konpositoreak
izandako eragina.
Laukote aparta
Iñaki Salvador Quartet izango bada abuztuaren lehen eguneko
protagonista nagusia, bigarren saio bat ere izango da Mintegian
izango diren zenbait irakasleen kontzertua izango baita jarraian.
Lehen ekitaldirako laukote bikaina osatu du pianojole donostiarrak
bere baitan, Peer Wyboris bateriajolea, Mikel Andueza saxojolea
eta Gonzalo Tejada kontrabajujolearekin izango baita elkarlanean,
estatu espainiarreko musikari gogotsuenetarikoak alegia. Ekitaldirako
prestatutako egitarauan laukoteko kide bakoitzak sortutako konposizioak
zein mitozko standarren berrikuste pertsonalak tartekatuko dira.
Mintegiko ikasleek eskuratuko dute protagonismoa abuztuaren 2an
Musika plazan izango den lehen ekitaldian; jarraian Jon Urrutia
musikariak burutzen duen hirukoa igoko da Munoako eszenatokira.
Kaleko Jam Sessions-ak
 Zarauzko
III Nazioarteko Mintegian murgildutako musikariek izango dute abuztuaren
3ko protagonismo osoa, lehenengo ekitaldian ikastegiaren inguruan
sortutako Big Band taldea arituko baita eta jarraian indarrak bilduko
dituzte ikaslee eta irakasleek Munoako eszenatokira elkarrekin igotzeko.
Azken eguneko saio nagusian Luis Camino & Abya Yalak eskuratuko
dute protagonismoa Musika plazan izango den kontzertuan. Luis Camino
perkusiojole, konpositore eta musika zuzendari donostiarrak, Pascal
Gaigne gitarra, teklatu eta perkusiojolea, Iñaki Salvador
piano eta eskusoinujolea, Jaiver Area bateriajolea, Ritxi Salaberria
bajujolea eta Luis Mari Moreno ‘Pirata’ saxo eta teklatujolea
izango ditu alboan. Talde erraldoi honetan jazzean, zinemagintzarako
doinu bandak egiten edo pop-rock doinuak jorratzen izurrigarriko
esperientzia duten musikariak tartekatzen dira. Camino, 21 Japonesas
taldearen sortzaileetarikoa, Zarauzko ekitaldian alboan izango dituen
musikariekin grabatu duen disko berria kaleratuko du aurten, bertan,
Nepal, India, Indonesia eta Thailandiako musika herrikoien elementu
aberatsak bateratu dituelarik.
Egun bakoitzeko saioak Munoan izango den Jam Sessionekin bukatuko
dira eta ekitaldie mintegietan diren ikasle eta irakasleek zein
agerraldietan izango diren musikari profesionalak igoko dira taula
gainera.
|
