|
|
 usika |
Jaietan
ospatuko den urteurrena
 Simple
Minds talde eskoziarra izango da uda honetan Euskal Herrian joko
duen talde indartsuenetarikoa baita Bilboko Aste Nagusiko egitarauan
tartekatutako ekitaldi disdiratsuenetarikoa ere. 17an izango den
ekitaldia, ezohiko tokian burutuko da Abandoibarra inguruan izango
baita, Renfe enpresak kontenedorak biltzeko erabiltzen zuen tokian
alegia.
Taldea sortu zenetik jarraitzen duten Jim Kerr eta Charlie Burchill
musikariek, Simpel Mindsen 25. urteurrena ospatzen ari dira 2002
urtean zehar eta hori ospatzeko Cry izenburua daraman lana argitaratu
dute, azken hamarkadan kaleratutako lehena eta ibilbidean ateratako
hamazazpigarrena. Disko berriaren aurkezpena apirilaren 17an egin
zuten sorterriko Glasgow hirian eta ondoren Europa barreneko birari
ekin zioten, tartean Valentzia, Vigo eta Madrilen kontzertu arrakastatsuak
eskainiz.
Argitaratutako disko berria Erresuma Batuan eta Italia artean grabatutako
lana da eta Jim Kerr taldeburuaren esanetan bertan agertzen diren
“lehen lau kantak Sizilian idatzi nituen eta eurek dira bizienak
eta freskoenak. Diskoaren inguruan eginbeharreko guztiak Glasgown
egin ditugu, lana bertan borobildu eta osatu baitugu”. Musikari
eskoziarrak onartu egiten du Cryen eragin nabarmena izan dutela
joera ezberdinetako doinu berritzaileak “Dj berrien eta dantzarako
erritmoen ikutua” agerian gelditzen direlako. Esandakoa baieztatzeko
Vince Clarke, Erasure taldea, Yazoo eta Depeche Moderen kolaborazioak
aipa daitezke. Hala ere, diskoan agertzen diren kantu guztiak originalak
izateaz gain “ikutu klasikoa duten pop doinuan murgiltzen diren
kantuak dira”. Dena dela, Kerrek bi disko betetzeko adina abesti
zituen eta datorren urtean “indar izugarria izango duen beste
album berri bat” ateratzeko asmoa agertu du.
2002 urteak beste koska bat jarriko du Simple Mindsen historian.
25. urteurrena ospatu, disko berria kaleratu eta Glasgow hirian
hasi zuten Europa, Amerika, Japon eta Australian barrena burutuko
duten lehen bira ia hamar urteko etenaldiaren ondoren.
Orain arte eskainitako aurkezpen kontzertuetan Kerrek agindutakoa
bete du taldeak, musikari eskoziarrak “show indartsuak taldean
eta doinuan oinarritutakoak” izango zirela esan baitzuen. Bere
esanetan, agerraldiak “osagarririk gabe eskainiko ditugu, ibilbide
berria hastea bezala aurreikusi dugulako eta birari zintzotasunez
aurre egiten diogulako”.
Abandoibarrako kontzertuan Cry disko berriko kantuak zein orain
arte argitaratutakoetan ospea eskuratu dutenak tartekatuko dituzte.
25 milioi diskotik gora saldu ondoren Don't you (forget about me),
Promise you a miracle, Let there be love edo Once upon a time bezalako
kantuek eman diete zalegoaren oneritsia
Simple Minds-en esanetan, urte hauetan taldea bizirik irauteko bi
arrazoi nagusi izan dira. “Alde batetik, 80ko hamarkadan talde
bikainak sortu zirelako baina ez dute izan guk izan dugun zortea,
eta bestetik talde sentimendua eta jarraitzeko erakutsi dugun adorea”.
Bi hamarkada eta erdiko ibilbidean taldeak ukaezina den eboluzioa
erakutsi du eta “nahiz eta teknologia berriak gehitu, gure
izaera mantentzea lortu dugu, gaur egun MP3 edo Internet gabe bizitzea
jasanezina izango litzatekelako”.
ABUZTUAK
17 AGOSTO (24.00)
ABANDOIBARRA - BILBAO
|
