|
|
 usika |
Kultura
desberdinak Bidasoan agerian
 Bidasoa-Txingudi
eskualdea osatzen duten Hendaia, Hondarribia eta Irun udalerriek
BidasoaFolk’02 jaialdi jaioberria ospatuko dute abuztuaren
23tik 25era bitartean, non kantu eta musika nagusituko diren. Ekimen
honetan kultura tradizional biziak aurkeztu nahiari antolatzaileek
Euskal Herriaren kultur ondare aberatsari balioz eman nahi diote
eta jarritako asmoak gauzatzeko dantza, kale antzerkia eta argazki
erakusketekin osatuko da egitaraua. Hiru egunetan zehar Irlandako
doinuak jorratzen dituen Limerick edo Zuberoakoak eta Lapurdikoak
lantzen dituzten Peio Serbielle eta Bidaia, hurrenez hurren, Mediterraneoko
erritmoa María del Mar Bonetek gerturatuko du eta Gaztelakoak
berriz Eliseo Parra musikariak.
BidasoaFolk’02 ekimena abuztuaren 22an abiatuko da Irunen,
hiriko Musika Bandak Zabaltza plazako kioskoan hamarretatik aurrera
eskainiko duen folk kontzertuarekin. Aldi bereko jarduera horri
hurrengo egunean Hendaiako Gaztelu Zahar pilotalekuan izango den
kontzertuak emango dio jarraiapena, non Peio Serbielle zuberotarra
eta doinu irlandarrak jorratzen dituen Limerick talde euskalduna
eszenarioan izango diren.
Peio Serbielle kantariak Estatu espainiarrean dagoen SGAEren parekoa
den SA-CEM erakundeak iazko musika tradizioanal eta Munduko musiken
saria eskuratu zuen Parisen 2001eko abenduan. Lau disko argitaratu
ondoren, bosgarrenean murgilduta dabil Serbielle, bertan Mikel Laboa,
Amaia Zubiria, Andra Mari Abesbatza eta beste Euska Herriko zenbait
musikariz gain Richard Galliano, Karen Mathesson edo Jean-Philippe
Rykiel laguntzaile dituelarik. Lan berrian Bulgaria, Grezia, Maroko
eta Japonian zehar bildutako doinuak ere tartekatuko dira.
Folk irlandarra
2000ko udan sortutako Limerick taldearekin burutuko da iragarritako
lehen kontzertua, non Ganbara, Txanbela, Alboka edo Euritan Blai
euskal talde ezberdinetan ibilitako zenbait musikariak, ska doinuak
jorratzen dituen Skunk taldean edo Bilbao Filarmonia klasikoan ibilitakoak
biltzen diren. Limericken zeltiar musika, bereziki irlandakoa, gogoko
duten bost musikari elkartzen dira. Modu tradizionalak eta akustikoak
eskaintzen dituzten doinuen artean Irlandako kanta ezagunez gain
Eskoziako, High Lands-eko edo Britainiako aireak ere tartekatzen
dira.
Mediterraneoko erritmoak nagusituko dira 24an Hondarribiako Gipuzkoa
plazan izango den agerraldian, saioan Mallorcan jaio eta kantari
bezala lehen urratsak Bartzelonan eman zituen María del Mar
Bonet-ek Raixa azken grabazioa aurkeztuko baitu.
25 urte kantagintzan
Disko berria iazko Grec jaialdiaren barne Plaça del Rei gunean
emandako bost ekitaldietan grabatu zuten eta bertan bere ikuslegoaren
aurrean burutu dituen 25 urte isladatzen dira. Diskoari izena ematen
dion Raixa hitza, arabiarrek Mallorcan izan ziren garaiko lorategia
da. Bisitarientzat irekia egon bazen ere, gaur egun itxita dago
eta bere etorkizuna zalantzan dago, porlanak irensteko arriskua
baitago. Lan berria aurkezteko, Bonetek ohiko dituen Joan Valent
eta berak zuzentzen duen Ars Ensemble oholtza gainean izango dira.
Azken kontzertua Irungo Santiago pilotalekuan burutuko da 25ean,
ekitaldian Lapurdiko Bidaia taldea eta Eliseo Parra gaztelatarra
izango dira. Ibilbide laburra burutu badu Bidaia taldeak, musikari
aski ezagunak biltzen ditu bere baitan, Caroline Phillips, Mixel
Ducau, Ritxi Salaberria eta Javi Areak osatzen baitute. Laukoteak
Euskal Herriko ohiko dantzetan oinarritako melodiak zein munduko
toki ezberdinetatik eskuratutako kantuak eskaintzen ditu.
Valladolideko Eliseo Parra musikariak esakiniko duen saioan, Viva
quien sabe querer martxoan aurkeztutako azken diskoan tartekatutako
kantuak nagusituko dira. Azken lana, bere taldekideekin batera hiru
urtetan burututako ikerketen ondorioa da, Parra eta musikariek elkarlanean
plazaratu baitute lan berria. Diskoan bildutako 11 kantuetan Iberiar
Penintsulako folklorea zein herri tradizioetan egindako lana nabaritzen
da, Parrak kultura desberdinak aztertu baititu eta gaztelaniaz gain
katalanez, galizieraz zein euskeraz egidako kantuak argitaratu ditu.
|
