|
|
 usika |
Jatorri
eta joera anitzetako abesbatzak
 Amerika,
Asia eta Europako zortzi abesbatza bilduko dira irailaren 6tik 13ra
artean burutuko den Arabako Nazioarteko Abesbatzen XXI. Astean.
70 agerraldi iragarri dituzte ohikoa denez, Printzipal Antzokian
13an izango den saioarekin amaituko dira agerraldiak, gonbidatuta
dauden talde guztiek eta Jesus Gurudi Orkestra parte hartuko dutelarik.
Aurtengo ekimenerako aukeratutako taldeen artean, 2000ko astean
ere izan zen Manilako U.S.T. Singers taldea izango da. Santo Tomás
Unibertsitateko taldeak hamargarren urteurrena ospatzen ari da eta
egindako ibilbidean hainbat sari eskuratu ditu, esaterako Galeseko
Llangollenen, non bost sari lortu zituen, edo iaz Txekiar Errepublikako
Olomuc-en urrezko bost domina eskuratu zituzten.
Korearrak lehen aldiz
Daeguko Emakumezkoen Abesbatza izango da Hego Koreatik Aste Koralera
datorren lehena. 1990ean sortutako taldeak Jae-Joon Lee maisuak
zuzentzen du eta taldearen errepertorioan Errenazimendu garaian
sortutako lanak, garaikideak eta sorterriko abesti folklorikoak
biltzen dira. Varnan iaz jokatutako Nazioarteko Lehiaketan urrezko
bi domina eskuratu zituen.
Guslak Ganbara Abesbatza, Bulgarian XIX. mendean sortutako taldea
da eta bere errepertorioan eliz doinuak zein profanoak, sorterriko
folklorea eta lan garaikideak lantzen ditu. Vasil Shevtanoffek zuzentzen
du taldea 1996tik eta bere zuzendaritzapean Italiako Arezzo eta
Gorizia lehiaketako lehen sariak eskuratu zituen.
Poloniako Olsztyn hiriko Pro Forma Ahots Taldea 2000 urtean sortu
zen Warmia eta Masuria Museoaren babesean eta taldearen errepertorioan
antzinako zein gaur eguneko doinuak tartekatzen dira, joera, garai
eta eskualde anitzetako lanak, landuz. Marcin Wawruk zuzendariak
ahots teknika sofistikatua bilatzea izanik.
Errepertorio eklektikoa
Ostravako Unibertsitateko Abesbatzaren ezaugarri nagusia Txekiako
XIX eta XX. mendeetako abesti sorta zabala eta handinahiak jorratzea
da. Limír Pivovarskek zuzentzen duen taldeak konposizio klasikoak,
garaikideak eta esperimentalak zein jazz piezak eta beltz espirutualak
biltzen ditu.
Lisboako Unibertsitateko Ganbara Abesbatza 24 kantarik osatzen dute
eta ‘a capella’ zein talde instrumentalekin batera abesten
errepertorio eklektikoa osatzea lortu dute. Taldea sortu zenetik
José Robert maisua da zuzendaria eta berarekin estrainatu
dute Portugalen Carl Orffen Catulli Carmina edo Dvoráken
Meza Re maiorrean.
Sloveniako France Presenen Abesbatzak 30 urteko ibilbidea du eta
eskaini dituen 600 kontzertutik gora garai eta konpositore ezberdinen
500 lan baino gehiago abestu ditu. Kranj hiriko taldea Primoz Kerstanj
maisuak zuzentzen du.
Sirley de Paulak 1995ean sortu zuen Brasiliako Abesbatzak izango
du Amerikako ordezkaritza Arabako jaialdian. De Paularen asmoa goi
mailako errepertorioa lantzea zen eta horretarako hiriko abesbatzetan
kantatzen zuten kantariak bildu zituen.
|
