abal gunea

ona Abierta

Hamleten bila joan eta ikusleak galdu

Hamlet obra Hamlet pertsonaiarik gabe. Hori izan da Ong Keng Sen zuzendariak aurtengo Hamlet jaialdian aurkeztu duen proposamena. Search: Hamlet titulupean Singapurreko zuzendariak kultur anitzeko emanaldia gauzatu du. Malasia, Indonesia, Thailandia, Japonia, AEB, Suedia eta Danimarkako artistak ibili dira Hamleten bila. Lan horretan Asiako dantza eta doinu tradizionalak, mendebaldeko dantza modernoarekin eta pop musikarekin nahastu dituzte. Proiektu iradokitzailea aktore eta dantzarientzat, baina ikuslegoarengana heldu ez dena.

Ez nuen Hamleten beste bertsio bat egin nahi, non obra amaitutakoan ikusleak Hamlet pertsonaia antzeztu duen aktorearen egokitasunaz mintzatzen diren. Gainera, eskuartean geneukan kultur anitzeko proiektua kontuan izanik, ezin nuen inor ikusi Hamleten paperean. Azkenean argi ikusi nuen Hamletek espazio biziduna izan behar zuela, egoera zehatzak gauzatu beharrean sentsazioak aditzera emango zuena” esaten du Ong Keng Sen zuzendariak Hamleten falta azaltzeko.
“Hamlet birpentsatu nahi nuen, bere baitan pertsona ezberdinak har zezan. Hamleten barne gatazkak eremu unibertsal batean kokatu nahi izan dut, gizabanako guztien eguneroko arazoen artean” dio zuzendariak.

Noh-antzerki japoniarra

Hamlet unibertsal bihurtu nahi horretan, zuzendari singapurtarrak ekialdeko eta mendebaldeko kulturak elkarrekin lanean jarri ditu. Mendebaldeak dantza modernoa, pop musika eta testu postmodernistak jarri ditu; ekialdeak butoh dantza, topeng maskara-dantza, kohn dantza, dantza thailandiarra eta Javako gamelan doinu tradizionalaren ekarpenak egin ditu.
Obra beraren egitura noh-antzerki japoniarrean oinarrituta dago. Noh-antzerki emanaldia bost obraz osatuta dago, bakoitza pertsonaia zentral baten inguruan burututakoa: jainko bat, gudari bat, emakume bat, ero bat eta deabru bat.
Egitura honi jarraituz, Search: Hamletek bost ekitaldi ditu, ekitaldi bakoitzak pertsonaia nagusi bat, eta protagonista bakoitzak Hamleten portaeraren alderdi bana irudikatzen du: Mamuaren liburuan, mamuak Hamleten haur galduaren aldea adierazten du. Gudariaren liburuan, Laertesek adiskidetasuna azaltzen du. Neska gaztearen liburuan, Ofeliak Hamleten portaera erreboltaria islatzen du. Emakume eroaren liburuan, Gertrudis erreginak Hamleten obsesioa sinbolizatzen du; eta Deabruaren liburuan, Klaudio erregeak tentaldia, errua eta ekintzarako gaitasunaren arteko borroka erakusten ditu.
Osagarri guzti hauek eskuartean izanik, Ong Keng Senek Asia eta mendebaldearen arteko batasuna osatu nahi du eta, une berean, globala eta tokikoaren arteko kontraesanak leundu, “horrela posible bailitzateke hizkuntz unibertsal bat sortzea, gure toki-ingurunetan ainguratuta dagoena”.

Ideia ona, gauzapen eskasa

Ong Keng Sen eta bere aktore-dantzari multzoa Hamleten gaztelura bertara abiatu ziren apirilean “Kronborgeko arkitektura barne-barnean sentitzeko. Artistek hainbat emozio harraskatu zituzten ormetatik, lurretik, isilunetik, airetik, oihartzunetik, Kronborgeko mamuengandik. Gela ezberdinetan aurkitutako arrasto hauek eszenatokira eraman ditugu” azaltzen du Ong Keng Senek.
Hain zuzen ere, horretan datza Search: Hamlet. Aktore bakoitzak bilaketa pertsonal horretan Hamleten esentziari buruz aurkitutakoa antzezteari ekiten dio, aktore ezberdinen antzezpenen arteko batasun askorik gabe. Obrak banakoen desfile baten antza hartzen du, eta Hamleten drama bidean galtzen da.
Gainera, diziplina anitzeko emanaldia burutu nahian, zuzendariak partaide batzuk beren esparru artistikotik atera ditu beste zerbait egiten jartzeko. Guztia oso ondo dago aktoreen bilakaera pertsonal eta artistikorako, baina ikusleekiko komunikazioa zaildu egiten du, are gehiago sentsazioak igorri behar direnean.
Kronborgeko patioan ikusleen erreakzioa ikusita eta egunkarietako kritikak irakurrita esan daiteke, emanaldiaren une gorena eman zela argi-joko baten bitartez Kronborg gaztelua biraka jarri zenean. Adierazgarria iruditzen zait, baita zoritzarrekoa ere.
Ong Keng Senek Hamlet obra hankaz gora jarri du, printze danimarkarraren istorioa aktoreen sentsazioekin ordezkatuz, guztia ekialdetik ekarritako arte-baliabideekin hornituz, eta aktoreak beren esparru artistiko propiotik atereaz. Dena pribatuegia egiten da, iniziatuentzat bakarrik, baina ikusle gehienok festa pribatu horretatik kanpo gelditzen gara eta Search: Hamletek kurtso amaierako antzezpen itxura hartzen du.

Teatro | Música | Danza | Audiovisuales | Zona Abierta | Agenda
Conócenos | Suscríbete | Contacta | Buscador | Números Anteriores