ntzerkia

tetro

Beldurraren mataza likatsua

Beldurra apo handi bat omen da, gure baitan lo dagoen apotxarra. Batzuetan, guk nahi gabe, esnatu ohi da, baina, azkenean logureak hartzen du, ia konturatu gabe lo seko gelditu arte. Orduan, sosegua gureganatzen da. Beldurraren agerpen ezberdin bi hauen artean kokatzen da Mari Produkzioak konpainia sortuberriaren lehen antzezlana, Zapoaren beldurra. Joan Manuel Serraten El príncipe azul abestia eta Juan beldurgabea ipuinean oinarrituz, Aguraineko konpainiak beldurra du mintzagai, zapo batek istorio ezberdinen bitartez eratzen duen mataza likatsua.

Lasaitasunaren bila

Karmele Pérez antzezle eta zuzendariaren aburuz, “gure haurtzaroan betidanik agertu diren pertsonaia beldurgarrietaz mintzo gara, kokoaz, mamuetaz. Nolabait, haurrengan sortarazten den beldurra gainditu beharra dagoela diogu”. Horretarako, istorio biak nahasi dituzte, hasieran ikuslegoarengan beldurra piztea du helburu non igel bihurtutako printzearen estutasuna helarazi nahi duten, gero, bigarrenean, beldurrik ez duen Juan pertsonaia literarioaren istorioan, ikara hori gainditu ahal izateko datuak azaltzen dira. “Antzezlana ikusi eta gero haurrak lasai asko ateratzea gustatuko litzaidake. Beldurraren bitartez hezi ohi ditugu umeak, eta horren inguruan gure ikuspuntua eman nahi dugu” dio zuzendariak.
Txotxongiloak nagusi diren antzezlana den arren, bi plano ezberdin izango ditu. “Istorio nagusiak erretaulan gertatuko dira, baina tartean, antzezle batek kontakizunak lotuko ditu” azaldu digu zuzendariak. Zaku-gizonaren alaba balitz bezala, antzezleak zakua eramango du, bertatik panpinak ateratzen dituen bitartean.

Teknika anitz

Zapoaren beldurra lanean, erretaula barruan gertatzen diren eszenetan, Meiga Arrue eta Karmele Pérez manipulatzaileek eskularrua eta barila teknikak erabiliko dituzte, kanpoan gertatzen diren lotura uneetan, berriz, bunraku eta muppet bezalako baliabideak erabiliz. Pérezen esanetan, “pertsonaiak sortzeaz gain, teknika ezberdinen bitartez istorioak agertzen dituen espazio ezberdinak sortuko ditugu”.
Mari Produkzioak konpainiak euskeraz eta erderaz eskainiko duen ikuskizun hau aurrera eramatea du lehen helburua, eta ondorioz, antzoki zein erakustoki guztietan berau antzezteko gaitasuna duen lana eratu dute. Zuzendariaren esanetan, “urteetan izan dudan esperientzia ikusita, hastea zaila da, ekoizketa prozesuari eskainitako denbora baino gehiago behar delako salmentarako. Dena den, ezin da jakin zer gertatuko den”.

Txotxongilo propioak

Karmele Pérez aguraindarra betidanik egon da euskal txotxongiloen munduarekin lotuta. Hasieran Taun Taun talde bergararraren partaide izan zen, ondoren Taupadan Printze Txikia antzezlanean manipulatzaile moduan ibilia da. Egun, lan pertsonalagoak eta berak asmatutako ideiak aurrera eramateko asmoz Mari Produkzioak konpainia sortu berri du.

AZAROAK 17 NOVIEMBRE (17.00)
HARRESI ARETOA - AGURAIN

Teatro | Música | Danza | Audiovisuales | Zona Abierta | Agenda
Conócenos | Suscríbete | Contacta | Buscador | Números Anteriores