|
|
 abal
gunea |
ona
Abierta
|
Bost
bider bost
 Data
borobila Bosteko 2002 erakusketa kolektibo ibiltariarentzat, hain
zuzen bostgarren urteurrena dela medio Carmelo Ortiz de Elgea, Ramón
Zuriarrain, José Ramón Anda eta Andrés Nagelek,
Aurkitutako paisaiak - Paisajes encontrados gaiaren inguruan, bakaoitzak,
bi obra erakutsiko dute. Lau artista hauez gain, eta ekimen berezi
legez, orain hamar urte hil zen Rafael Ruiz Balerdi margolari bizkaitarra
omenduko dute.
Balerdi, euskal artista garaikide garrantzitsuenen artean koka daiteke.
Abstrakzioaren hildotik jo zuen aintzindarietako bat izan zen eta
bere izakerak plastikaren alorra zaletasun agortezinez lantzera
eraman zuen, betiere errealitatea irudikatzeko modu ezberdinak aztertu
eta esperimentatu nahian. 1960an bere lana Veneziako Bienalean ikusgai
egon zen, gerora New York, Pittsburg, Alemania, Mexiko eta beste
hainbat lekutan ere erakutsi zuen.
Bosteko ekimena nolabaiteko ibilbide finko bat duten euskal artista
garaikideen lana bultzatzeko eta beraien obrak publiko zabalera
hurreratzeko sortu zen. Urrian Basauriko Torre de Arizen ikusgai
egon ondoren, azaroan zehar Mungiako Torrebillela Kultur Etxera
pasatuko da mostra. Handik, abenduan, Zornotza Aretora eramango
dute; urtarrilean berriz Arrigorriagako Kultur Etxean kokatuko da
eta azakenik, otsailean, Erromoko Kultur Etxean izango da ikusgai.
 José
Ramón Andak egurra, haritza, ezpela eta astigarra, erabiltzen
du oinarrizko material gisa. Aita ebanista izanik harengandik jaso
zituen langai honi buruzko aurreneko ikasbidea. Eroritako zuhaitzak
berreskuratzen ditu piezak lantzeko, Barcusi artistaren ideiari
jarraituta es-kultura hazkutza gisa hartuz.
Andrés Nagel 70eko hamarkadaren hasierako arte garaikidea
berritzen ziharduenetarikoen taldean sartu beharko genuke. Oso da
berezia artista donostiarrak burutzen duen lana, irudimenetik edota
errealitatetik jasotako milaka istorio adierazteko gai da eta erabiltzen
dituen material eta baliabideak ere bere ideiak bezain aberatsak
dira. Oraingoan gorputzaren egitura gogorarazten diguten eskulturak
dakartza, berun, lanabes eta poliester gaineko oleoan eginak teknika
bikoitza erabiliz.
Carmelo Ortiz de Elgea 60. hamarkadaren bukaerako eta 70eko Arabako
pinturaren artista adierazgarrienetariko bat dugu. Figurazioak eta
abstrakzioak txandakatzen dira bere lanetan, halaber ez ditu gogoko
estilo ezta arauei jarraitzea. Bere ibilbidean zehar zaletasun handiz
landu du paisaia, eremu natural honen esperimentazio sakona burutuz
deskribapen hutsean gelditu beharrean.
Ramón Zuriarrain 1972ko Euskal Eskolako taldeen ondoren sortutako
artisten belaunaldikoa da. Estatu zein Europan andana bat bakarkako
erakusketa burutu ditu bere ibilbide luzean zehar. Autore donostiarrak
pintura betea, saiatua, formatu handietan konprometitua, keinu zorrotzekoa
eta kolore neurritsukoa sortzen du. Urrutitik behatuz paisaiak,
irudimenezko eszenak, giro abstraktuak atmosfera urtsuak aurki daitezke.
Erakusketa honetako bi lanetan intentsitate ezberdineko uneak adierazten
ditu, zatiez eratutako irudia eta ernetzen ari den paisaia, non
pinturak elur-jauzi baten antzera amiltzen ari dela dirudien.
|
