ntzerkia

tetro

Oskar preziatuaren bila

Borja Relaño

Zinemaren munduan murgildu berri dira bilboko Hortzmuga taldeko kideak haurrei zuzenduriko kale-ikuskizun berria den Klaketan, non zinemagile talde zoroa herriko plaza eta kaleetara helduko den ‘Mendebalde urruneko neska ausarta’ pelikula filmatzeko asmoz. Indiar eta bakeroen filma honek, ordea, buruhauste bat baino gehiago ekarriko die, filmea aurrera eramateko zine-izar berriak bilatu eta eszenak grabatzeko ikusleen partehartzea ezinbestekoa baita. Horrela, Arantxa Goikoetxearekin batera ikuskizunaren koordinatzaile den Gorka Zerok azaldu digunez, “ikuskizuna emango den lekura helduko gara eta bertan dauden pertsona guztiak gureganatuko ditugu, den-dena gure pelikula filmatzeko prestatuta balego bezala, udaletxearen aurrealdea, esaterako, dekoratua balitz moduan...”.

Lengoaia teknikoa

Izaera nabarmena duen zuzendaria, glamour izugarria duen zine-izarra eta burua non daukan ere ez dakien kameraman despistatuak osatzen duten aparteko zinemagile taldea inguruak miatzen eta beharrezko extra-paperak banatzen hasiko da. Halere, ez da batere erraza izango, filmean partehartzeko edozer emango luketen bi udaltzain aurrean topatzen duten guztia nahasteko asmoz agertuko baitira.
Guzti hori dela medio, Hortzmuga taldeko antzezleek plazaratutako pertsonai barregarriek ikuslegoa zinemaren mundu liluragarrian murgilduko dute, horretan erabiltzen diren planu motza edota mobiola bezalako kontzeptu ohiekoenak jorratuz. Koordinatzailearen esanetan “lengoaiaren zehaztasunak istorioaren nondik norakoak ahalik eta hoberen lotzen lagunduko digu eta, horrez gain, ikuskizunak izan dezakeen helburu pedagogikoari begira, haurrek zinemagintzaren sekretuekin duten lehen kontaktua izan daiteke”.
Izan ere, ‘Mendebalde urruneko neska ausarta’ delako filmea burutzeko protagonistek errealitatean egin ohi den bezalako dinamika erabiliko dute, hau da, eszenak ekoizketa prozesuak agindutakoaren arabera grabatuz eta ez gero pelikulan ikusiko diren ordenean, “eta hasiera batean kaosa irudituko zaiena, amaieran zentzuna hartuko du, titereekin proiekzioaren parodia egingo dugulako”.
Klaketaren ikuslegoak, beraz, parte hartu berri duen pelikularen estreineko emanaldia ikusteko aukera izango du, non indiar neska baten eta bakero baten arteko amodiozko istorioa kontatzen den. Indiar eta bakeroen pelikulen aitzakia erabili arren, Hortzmugako kideek filma horietan eman ohi den onak eta txarrak kontzeptuak saihestu dituzte, “azken urteotan haurrak gero eta biolentoagoak direla nabari dugulako, eta aktibitatea eskatzen duen edozein antzerki emanaldik aurrean duena jotzera bultzatzen baitu”.

Hastapenetako antzerkia

Bilboko konpainiak ikuskizun berriak bata bestearen atzean plazaratzearen irrika duen heinean eta antzerkiak eskaintzen dituen genero gehienak ikutu ondoren, Hortzmugaren hasierako formak berreskuratzera dator Klaketa, non antzerkia eta jolasaren arteko mugak itxuragabetzen diren animazioari lehentasuna emanez. Gorka Zerok esan digunez “nahiz eta urteak pasa ahala beste adierazpide batzutara eboluzionatu dugun, ez ditugu konpainiaren sorkuntzako izaerak ahaztu nahi”.
Hortaz, klownaren ikuspegitik ekin diote euskeraz zein gazteleraz egingo duten Klaketa honi non pertsonaientzat mundua zoroetxe ikaragarri haundia den. Eszenaratzean ere konpainiaren ezaugarriak nabarmenduko dira, Kukubiltxo konpainiaren tailerrean egindako lau metrotako panpin artikulatuak erabiliz edota audioa daraman estruktura mekanikoa eramanez, dena Lucky Luck-en komiki eta 50. hamarkadako wenstern zinearen estetikaren ikuspegian oinarrituz.

MARTXOAK 1-4 MARZO
BEGIRATU AGENDA

Teatro | Música | Danza | Audiovisuales | Zona Abierta | Opinión | Agenda
Conócenos | Suscríbete | Contacta | Buscador | Números Anteriores