ntzerkia

tetro

Marko Polo musikaria

Muzziki eta Muzziko pertsonaien esku, Pok Produkzioak ekoiztetxe berriak sortutako Muzzikiren bidaia harrigarria haur ikuskizunak, munduko bost kontinenteetatik abentura musikala proposatzen du. Pascal Gaignek bere semeari kontatzeko asmoz inprobisatutako ipuin eta fabulak oinarri eta urteetan etxean bildutako instrumentu musikal exotikoak erabiliz, haurrei euren unibertso txikitik mundu zabalerako bidea aurkeztuko die. Bertan, Muzziki pertsonaiak bere bidaia harrigarrietan bere lagunak diren animaliekin batera bizitako istorioen berri ekarriko dizkie, zeinetan munduko elezaharretako pertsonai mitologikoak asmatutako lagunekin nahasten diren.

Kokapen geografikoa

Muzziki pertsonaiarena egingo duen Olatz Beobiderekin oholtza konpartitzen duen eta Muzzikorena egingo duen Pascal Gaignek azaldu digunez “ipuinekin batera benetazko informazioa eskainiko dugu, hala nola, mintzo garen leku bakoitzeko oinarrizko elementu geografiko eta kulturalen ezaugarriak azalduko dizkiegu”.
Alabaina, 3 eta 8 urte bitarteko haurrentzat zuzendua dagoenez emango den informazioa adinaren araberakoa izango da, zeren eta Beobide antzezle eta zuzendariaren aburuz, “antzezlan amaitua den arren, ez da itxia izango. Emanaldi bakoitzeko ikuslegoaren ezaugarriek markatuko dituzte emanaldiaren nondik norakoak. Izan ere, herri txikietako eskola unitarioetan antzeztea izugarri gustatuko litzaiguke, zeinetan adin ezberdina duten haurren aurrean egin beharko genuke”.
Edozein dela ikuslegoa, “haurtzaroko Marko Polo” bezala definitzen duten Muzziki bere bidaietan bizitakoak kontatzera helduko da, antzerki eta ipuin kontalaritzaren arteko bidean eta publikoaren partaidetza aktiboa eskatuz.

Xirimiri doinuak

Txina, India edo Arabia bezalako lekuen informazio geografikoaz gain, Muzzikiren bidaia harrigarriak munduko zolitasun ezberdinei hurbiltzea du xede. Antzezlanak agertuko dituen kultura bakoitzeko erritmo esanguratsuetan oinarritu da Gaigne musika originala konposatzerako orduan.
Bere nahia haurrengan instrumentu eta erritmo exotikoenganako kuriositatea piztea da eta musikariak argitu digunez, “kontzertu didaktikoa ez den arren, amaieran instrumentuei buruzko galderak egiteko beta izango da”. Haatik, Beobidek azaldu digunez “musikarekiko zaletasuna piztea den helburu hori xirimiriaren antzekoa izatea nahi dugu, hots, oharkabe bustitzen duena”.
Muzzikiren bidaia harrigarriaren estetikak ikutu behar dituen gaiak izango ditu adierazpide, alde batetik munduko irudikapena gogora dakarren eszenografia eta bestetik Mokugyo, Kanun, Ud, Veena, edota Berimbao bezalako instrumentu exotikoak direla medio.

Ekoiztetxe sortuberria

Pok Produkzioak ekoiztetxea Pascal Gaigne, Olatz Beobide eta Kris Barkok sortu berri dute edozein egitasmo eszenikoren ekoizketarako behar diren baliabideak eskaintzeko asmoz. Joan den otsailaren 16an Korrika Kulturalari hasiera eman zion Hamalau Baietz (1965-75) ikuskizuna euren ardurapean burutu zen, non dantza, zuzeneko musika eta antzerkia uztartu ziren.

APIRILAK 12 ABRIL (18.00)
ZORNOTZA ARETOA

Teatro | Música | Danza | Audiovisuales | Zona Abierta | Opinión | Agenda
Conócenos | Suscríbete | Contacta | Buscador | Números Anteriores