|
|
 usika |
Folk
berriaren indarra
 Folk
zaletuek aukera paregabea izango dute maiatzean zehar iragarritako
emanaldiekin gozatzeko, euskal eszenarioetan Bill Jones, Hedningarna
edo Phil Cunningham & Aly Bainren kontzertuak izango baitira,
besteak beste.
Bill Jones izen artistikoa duen Belinda Jones artistaren doinuak
nagusituko dira maiatzaren 9an Debako Zubeltzu aretoan eta bi egun
geroago Euskalduna Jauregian. Bill folk zirkuituan bete-betean sartuta
dago azken hiru urtetan, bakarkako lehen konzertua eman zuenetik
alegia. Ahots gozo eta arimaz betea izateaz gain, akordeoia, pianoa,
txirula eta whistle irlandarra jotzen ditu. Zuzeneko emanaldietan,
bihotzera heltzen diren kantuak, hankak mugiarazten dituzten piezak
eta istorio liluragarriak isladatzen dituzten kantak aurkezten ditu.
Bere estilo bizi eta freskagarria talentu berri kitzikagarri gisa
txalotu dute, musika akustikoaren jarraitzaile leial eta berriak
gozaraziz. Turn to me estreineko diskoarekin, BBC Folk Awardsetan
Horizon saria irabazi zuen urteko ustekabeko artista gisa. Egun
bere hirugarren diskoa grabatzen ari bada ere, azken urteotan folk
eta musika klasikoko tutore lanetan ihardun du.
Iparraldeko berotasuna
Europako iparraldeko taldekideekin osatutako Hedningarna taldeak
The best of Hedningarna bere azken lana aurkeztuko du maiatzaren
16an Barakaldo Antzokian. Seikote honek, inolako sentiberatasunik
gabe sustraietako folkari gehigarri batzuk erantsi dizkio, horrela,
rock kitarren doinu indartsua, musika tekno errepikakorra, Irlandako
soinu zeltiar eta ekialdeko akorde bereziak nahastu eta azaleratzen
dituzte.
Suedia eta Finlandiako partaideak dituen talde honek egungo teknoaren,
‘neopsikodelik’aren eta ‘rave’aren oinarriak
jorratzen ditu. Ibilbide profesionala 1987an hasi ondoren, taldearen
izen bera duen disko instrumentala argitaratu zuten bi urte geroago.
Jarraian, Grammy suediarraren Urteko folk diska onenaren saria eskuratu
zuten Kaksi! lanarekin eta 90.eko hamarkadan Trä, Hippjokk
eta Karelia Visa diskoak argitaratu zituzten. Azken disko horretan
jatorriz doinu Errunikoak dituzten eta Finlandiako kantagintzan
tartekatu diren abestiak biltzen dituzte.
Bikote aparta
 Phil
Cunningham & Aly Bain bikoteak Irlanda eta Eskoziako doinu herrikoiak
gerturatuko dituzte Euskalduna Jauregira maiatzaren 25ean eskainiko
duten entzunaldian. Cunninghamek hiru urterekin hasi zuen bere ibilbide
musikala eta hastapeneko urratsak arlo klasikoan eman bazituen,
ohiturazko musikarekiko maitasuna eta jakinmina nabarmendu zitzaio.
Silly Wizard eta Relativity taldeetan izan bazen, bakarkako ibilbidea
ere jorratu zuen eta beste hainbat musikarirekin birak egin zituen,
Kepa Junkera eta Bonnie Raitt tarteko.
Aly Bain hamaika urterekin bibolina jotzen hasi zen. Musika klasikoko
maisu haundiekin ikasteko aukera izan arren, adituek beharala hartu
zuten aintzakotzat, bere jotzeko molde ikusgarriari esker eta tonalitatea
eta trebetasun teknikoa lagun zituela. Irlandako eta Ezkoziako musika
tradizionalaren elkarketak garrantzi haundia izango du bere lanetan.
Ali Bain, gaur egun folk doinuak bikain lantzen dituen Boys of the
Lough taldean zein Hue and Cry, Eddi Reader, Fish, Rcjhard Thompson
eta Runrig taldeetako kidea izan da.
BEGIRATU
AGENDA
|
