|
|
 usika |
Gaurkotutako
herri-doinuak
Euskal
Herriko zein Bretainia, Kataluña, Afrika, Provenza edo Moldaviako
doinuak nagusituko dira aurten ere Irun, Hondarribia eta Hendaian
abuztuaren 21a eta 24a artean burutuko den Bidasoa Folk 2003 ekimenean.
Mugarik gabeko eta musika tradizionalaz osaturiko jaialdiak, kulturak
elkarrekin topo egin eta nahasten dira Atlantikoko eta Bidasoako
urak bezala. Marc Egea eta Pomada kataluniarrak, Ipar Euskal Herriko
Elaudi, Gaztelako Eliseo Parra, Hungariako Zurgó, Bretainiako
Doming Bouchard eta Arz Nevez eta Ginea Konakriko Kouyate &
Dunyakan talde eta bakarlarien kontzertuez gain, kaleko musika animazioa
eta antzerkia, mintzaldiak eta kantu herrikoien inguruko animazioarekin
burutuko da egitaraua.
 Pirinioetako
musikarekin abiatuko da abuztuaren 21ean Bidasoa Folk 2003 ekimena,
lehen ekitaldi horretan Marc Egea kataluniarrak ahotsa eta zanfonarekin
osatutako kontzertua eskainiko baitu. Bere ibilbide profesionala
1992an hasi zuen Músics de Safeu taldea sortu zuenean eta
Carlos Núñez edo Aïsha musikariekin kolaboratu
ondoren, gaur egun Europan musika tradizionaleko talde ezagunenetakoa
den Pont d’Arcalís-en jarraitzeaz gain ‘Symphonia
Quaretet’eko kidea da ere. D’aquí, d’allà
i de més enllà izeneko diskoa argitaratzeaz gain,
zanfonajole bakarlaria eta flabiol musika-tresna irakasle kataluniarrak,
berak konposatutako edo gai tradizionaletan oinarritutako errepertorioa
eskaintzen du.
Provenceko musika
Lehen eguneko ekitaldia Irun Hiria Musika Bandak Irungo Zabaltza
Plazako kioskoan eskainiko duen kontzertuarekin burutuko da, non
musika tradizionalean oinarrituako doinu eta obrak nagusituko diren.
Hendaiako Abbadiako gazteluan abiatuko dira bigarren eguneko ekitaldiak,
‘Provence-ko Musika Gogoan’ izenburupean, musikaz apaindutako
mintzaldia eskainiko baitu André Gabriel musikari eta ikerlariak.
Saio horretan Provenzako berrogei musika tresna inguru aurkeztuko
ditu eta bakoitzaren testuingurua zehaztu ondoren, kultura ezberdinetako
antzeko musika tresnekin alderatuko ditu.
Hondarribiako Gipuzkoa Plazan burutuko da 22ko kontzertu nagusia
eta bertan Elaudi eta Eliseo Parra izango dira. Hazparne eta Itsasuko
musikariekin osatutako Elaudi taldeak, euskal bertso zaharrekin,
zein hitz eta musika berriak sorturik burutzen du bere errepertorioa.
Kantu gehienak hiru ahotsetan eta bi gitarrez lagunduta eskaintzen
dituzte eta bertan Hego Amerika, Errumania edo munduko beste herrialdetako
eritmoak Euskal Herrikoekin nahasten dira.
Bretainiako gaua
Eliseo Parra musikari eta ikerlariak Viva quien sabe querer argitaratu
duen azken diskoko kantuak eta bere ibilbide emankorrean sortutako
abestiak tartekatuko ditu. Gaztelako musikariak Iberiako penintsulan
izan diren kulturetako folklorea eta tradizioak aztertu eta arreta
berezia eskaini die denboraren poderioz galtzear baitaude.
‘Bretainiako gaua’ izenburupean, bi saio iragartzen dira
Bidasoa Folk jaialdiko hirugarren egunerako. Lehena Hondarriabiako
Carlos V. paradorrean burutuko da eta protagonismo nagusia XIV.
mendetik jo gabe zegoen eta Doming Bouchaud musikariak errekuperatu
duen harpa zeltiarrak jasoko du. Bouchaud Bretainiako musika tradizionala
harpara egokitzeko lanean dihardu.
Irungo Santiago pilotalekuan burutuko da eguneko bigarren ekitaldia,
non Zurgó hungariarrak eta Arz Nevez bretainiarrak eszenarioan
izango diren. Zurgókoek Moldavian bizi diren hungariar talde
etnikoaren ‘cságó’ deituriko kultura eta
musika mota bizirik mantentzeko ahaleginak egin dituzte. Arz Nevez
hari laukoteak, bestalde, harira egokitutako doinu zeltiarrak (jatorriz
‘plinn’ dantza bretoian eta ‘jigs’ eta ‘reel’
irlandarretan oinarritzen direnak) zein beraientzat espreski konposatutakoak
eskaintzen dituzte.
Hendaiako Gaztelu Zahar pilotalekuan burutuko da Bidasoa Folk-en
azken jardunaldia eta bertan Pomada taldea eta Ginea Konakryko N’Faly
Kouyate & Dunyakan izango dira. Kataluniarren errepetorioan
kantu tradizionalak nahiz beraien konposizioak eta egungo tex-mex,
rumba, rock eta herri kantuak aurki daitezke. N’Faly Kouyate,
bestalde, griot kultura lantzen duen musikari gaztea da eta berak
sortu zuen Dunyakan taldean kora, djembe, balafona zein kontrabajua
eta bateria tartekatzen dira, Gineako doinuez gain, jazza eta bluesa
egiten dutelarik.
|
