ntzerkia

tetro

Nortasunaren bila

Ezberdin sentitzearen eta nortasunaren bilaketaren inguruan gogoeta egiten du Hika Teatroaren Groau! ikuskizun berriak. Azkenengo hau areto barnean antzezten duten haurrentzako bigarren lana izango litzateke, aurrenekoa, Garbi Losadak zuzendutako Aguro izan baitzen.
Lan honi ekiteko ideia kasualitateari zor zaio. Iaz, Eusko Jaurlaritzak ematen dituen diru laguntzen deialdian bat egin zuten Yolanda Arrieta, Groau! lanaren egileak, eta Agurtzane Intxaurragak, Hikako kide eta proiektua zuzentzeaz arduratu dena. “Ixa gure azken lanaren gidoia aurkeztera gindoazen Arantza Urretabizkaia eta biok. Bertan Yolandarekin topo egin genuen eta geuk nahi genuenean, bere lanen bat taularatzeko prest egongo litzatekela jakinarazi zigun. Azkenik, diru-laguntza jaso zuen testua idazteko eta amaitu ondoren, froga bat bidali zigun, ia zer iruditzen zitzaigun”, dio Intxaurragak.

Egitura klasikoa

Istorioak Txano Gorritxu, Edurne Zuri eta antzeko ipuin klasikoen egitura darrai. Protagonista, Mitsi katakume nerebea dugu. Identitate krisia bizi du eta, nortasuna bilatzeko helburuarekin, abentura bat hasiko du hor nonbait. Ibilbide horretan Erbiron, Azerito edo Katagorria ezagutuko ditu eta, besteak beste, txakurren herrira ere iritsiko da.
Antzezpena hiru eta zortzi urte bitarteko umeentzat egokitu dute. Adin tarte zabala izanda ere Agurtzane Intxaurragaren esanetan antzezlanak baditu txikienak eta nagusienak erakartzeko haina elementu emozio eta istorioaren gorabeherekin jokatuz.
Oinarrizko testutik taula gainean ikusiko den muntaira badira aldaketak, halaber, egilearen aldetik ez da inolako eragozpenik egon, alderantziz, Arrietak berak ere parte hartu baitu gidoiaren egokitzapenean. Egitura klasikoa izaki, eszenaratzerakoan modernitatea edo egungo ikutua ematen saiatu dira. “Nire lan egiteko era oso bisuala da eta garrantzi handia ematen diot alde horri. Eszenak, organikoa atera behar du baina partitura bat balitz azaltzen saiatu naiz, beraz, mugimendu guztiak behar bezala zehaztu eta neurtuak daude“ dio Intxaurragak.

Hirukoa eszenan

Konpainiak hiru aktoreentzako zeukan proiektua planteatuta eta arlo honetan ere izan dute lanik. Aukeratutako antzezle hirukotetik Miren Gojenola da Hikako kide bakarra, Belen Cruzek orain hiru urte utzi baitzuen taldea; halaber, kontaktu zuzena izaten jarraitzen du muntai honetarako konpromezua hartu duelarik. Bestalde, Niko Lizeaga konpainiakoentzat ezaguna den aktorea ere bada proiektuaren barne. “Kreazio prozesua azkar xamar joan da eta denbora ez dugu soberan izan. Zentzu honetan aktoreen lan egiteko era ezagutzea ikaragarrizko abantaila izan da, kontutan izanik gainera Belen izan ezik, bai Mirenek eta bai Nikok bosna pertsonai antzezten dituztela” dio zuzendariak.
Bestalde, musika eta eszenografia sorkuntzan kolaborazio interesgarriak izan dituzte. Santos Bregaña eta Anne Ibañezek osatzen duten ‘Laia konpainiak’ burutu ditu jantzi, atrezzo eta eszenako elementuak. “Antzerki proiektu baterako lan egiten duten lehen aldia da baina badakigu diseinu mailan ospe handia dutela; are gehiago, orain gutxi mundu mailan sari garrantzitsua jaso omen dute. Lan honetan papiroflexian oinarritu dira bai pertsonaien egokitze zein eszenografia eratzeko”, aurreratzen du Intxaurragak.

Erritmo ezberdinak

Jabier Muguruzak, bestalde, aktoreek abesten dituzten kanta eta orohar antzezlaneko musika guztia sortu du. Hikakoek berarekin kolaboratzen duten lehen aldia bada ere, taldekoek bazekiten umeen mundua ez zitzaiola arrotz egiten literatura mailan haurrentzako ipuinak eta abar idatziak izanik. Ondorioz, testua helerazi zioten eta asko gustatu zitzaionez baiezkoa eman zien. “Ekainean ikuskizunaren zirriborro txiki bat egin genuen aukeratutako erritmoak aztertzeko, testuak eta gainontzeko baliabideek balio zuten frogatzeko. Muguruzarekin aldez aurretik izan nuen hartu-emana baina froga honen ondoren nondik-norakoak argiago ikusi zituen. Esan beharra dago, anitz erritmo konbinatzen dituela kantuetan salsa edo reggaetik hasita rockera arte” azpimarratzen du zuzendariak.

Seda

Orain lau urte Hikak bide berri bati ekin zion. Euskarazko lanak soilik egitetik bere lan baten erdarazko bertsioa eskaintzen hasi ziren merkatua zabaldu nahirik. Beraz, abendura begira gaztelaniazkoari ekitea pentsatzen dute.
Honekin batera badute esku artean konpainiarentzat aurrerapausu ikaragarria suposatuko duen formatu handiko proiektu bat. Alessandro Bariccoren Seda obra taularatzear daude eta, dagoeneko Intxaurragak eta Arantza Urretabizkaiak aurreratua dute gidoia. Lasaitasunez hartzeko erabakia hartu dute aurten produzitzeko hainbat saiakera eginak baitzituzten, baina denbora eta zirkustantziak kontra izan dituzte. Horregatik Hikako kideek, bere buruari konpetentzia ez egitea erabaki dute eta urrirako atzeratzu dute plangintza guztia.

Yolanda Arrieta

Antzerki eta literatura gaiekin erlazionaturiko lana burutu du urteetan, antzezpen eta idazketa tailerrak koordinatuz edota gidoigile gisa. Bestalde, 90. hamarkadaz geroztik, hainbat testu dramatiko eta ipuin ere argitaratu ditu eta zenbait literatur sari jaso ere, tarteko Begigorriaren erlojua lanagatik 1992an jasotako Ediciones SMen Bapore saria.

IRAILAK 19 SEPTIEMBRE (18.00)
SAN AGUSTIN KULTUR GUNEA - DURANGO

Teatro | Música | Danza | Zona Abierta | Opinión | Agenda
Conócenos | Suscríbete | Contacta | Buscador | Números Anteriores